ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭ ﯞﻩ ﺗﺎﯓ ﺳﯘﻻﻟﯩﺴﻰ ﮪﻪﻗﻘﯩﺪﯨﻜﻰ ﺗﯜﮔﯜﻣﻪﺱ ﻳﺎﻟﻐﺎﻧﻠﯩﺮﻯ

ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭ ﯞﻩ ﺗﺎﯓ ﺳﯘﻻﻟﯩﺴﻰ ﮪﻪﻗﻘﯩﺪﯨﻜﻰ ﺗﯜﮔﯜﻣﻪﺱ ﻳﺎﻟﻐﺎﻧﻠﯩﺮﻯ

.
ﺋﻪﺭﺗﯧﻜﯩﻦ ﺋﻮﻏﯘﺯ

.

ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﻯ 25-ﻣﺎﺭﺕ ﺋﯧﻼﻥ ﻗﯩﻠﻐﺎﻥ ﻳﺎﺯﻣﯩﻠﯩﺮﯨﺪﺍ، ﻛﯘﭼﺎ ﯞﻩ ﺋﯘﻧﯩﯔ ﺋﻪﺗﺮﺍﭘﯩﺪﯨﻦ 2007-ﻳﯩﻠﯩﺪﯨﻦ 2025-ﻳﯩﻠﯩﻐﯩﭽﻪ 2200 ﻗﻪﺑﺮﯨﺴﺘﺎﻧﻠﯩﻖ، 2800 ﺋﻪﺳﺎﺭﻩ-ﺋﻪﺗﯩﻘﻪ ﺑﻮﻳﯘﻣﻠﯩﺮﯨﻨﻰ ﺗﺎﭘﻘﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﮪﻪﻣﺪﻩ ﻛﯘﭼﺎ ﺷﻪﮪﻪﺭ ﺋﻪﺗﺮﺍﭘﯩﺪﺍ ﻳﯧﯖﯩﺪﯨﻦ ﺑﺎﻳﻘﺎﻟﻐﺎﻥ ﺗﺎﯓ ﺳﯘﻻﻟﯩﺴﻰ ﺩﻩﯞﺭﯨﮕﻪ ﺋﺎﺋﯩﺖ ﺑﯩﺮ ﻗﻪﺑﺮﻩ ﮪﻪﻗﻘﯩﺪﻩ ﺗﻮﺧﺘﯩﻠﯩﭗ، ﺑﯘ ﻗﻪﺑﺮﯨﻨﯩﯔ ﺗﺎﯓ ﺳﯘﻻﻟﯩﺴﯩﻨﯩﯔ ﻏﻪﺭﺑﯩﻲ ﺭﺍﻳﻮﻧﻨﻰ ﺑﺎﺷﻘﯘﺭﯗﺷﻘﺎ ﻣﻪﺳﯘﻝ ﺋﻪﻣﻪﻟﺪﺍﺭﻯ ﻳﯩﻦ ﮔﯘﯕﻨﯩﯔ ﻗﻪﺑﺮﯨﺴﻰ ﺋﯩﻜﻪﻧﻠﯩﻜﯩﻨﻰ، ﺑﯘ ﭘﺎﻛﯩﺘﻨﯩﯔ “ﺗﺎﯓ ﺳﯘﻻﻟﯩﺴﯩﻨﯩﯔ ﻏﻪﺭﺑﯩﻲ ﺭﺍﻳﻮﻧﻨﻰ ﺋﯜﻧﯜﻣﻠﯩﻚ ﺋﯩﺪﺍﺭﻩ ﻗﯩﻠﻐﺎﻧﻠﯩﻘﯩﻨﯩﯔ ﭘﻮﻻﺗﺘﻪﻙ ﺩﻩﻟﯩﻠﻰ” ﺋﯩﻜﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﯛﺷﻜﻪﻥ.

ﺧﯩﺘﺎﻱ “ﺷﯩﻨﺠﺎﯓ ﺋﻪﺯﻩﻟﺪﯨﻦ ﺟﯘﯕﮕﻮﻧﯩﯔ ﺋﺎﻳﺮﯨﻠﻤﺎﺱ ﺑﯩﺮﻗﯩﺴﻤﻰ ﺋﯩﺪﻯ” ﺩﯦﮕﻪﻧﻨﻰ ﺗﺎﺭﯨﺨﯩﻲ ﺩﻩﻟﯩﻠﻠﻪﺭﮔﻪ ﺗﺎﻳﺎﻧﺪﯗﺭﻏﺎﻧﺪﺍ، ﺋﯩﺰﭼﯩﻞ ﮪﺎﻟﺪﺍ ﺗﺎﯓ ﺳﯘﻻﻟﯩﺴﻰ ﺩﻩﯞﺭﯨﺪﯨﻦ ﺑﺎﺷﻼﭘﻼ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺗﯧﺮﺭﻭﺗﻮﺭﯨﻴﻪﺳﯩﻨﻰ ﺋﯚﺯﻟﯩﺮﯨﻨﯩﯔ “ﻏﻪﺭﺑﯩﻲ ﺭﺍﻳﻮﻧﻨﻰ ﺑﺎﺷﻘﯘﺭﯗﺵ ﻗﻮﺭﯗﻗﭽﻰ ﻣﻪﮪﻜﯩﻤﯩﺴﻰ” ﺋﺎﺭﻗﯩﻠﯩﻖ ﺋﯩﺪﺍﺭﻩ ﻗﯩﻠﻐﺎﻧﻠﯩﻘﯩﻨﻰ ﺑﺎﺯﺍﺭﻏﺎ ﺳﯧﻠﯩﭗ ﻛﯧﻠﯩﺸﺘﻰ. ﮪﺎﻟﺒﯘﻛﻰ، 7-8-ﺋﻪﺳﯩﺮﻟﻪﺭ ﺗﺎﯓ ﺳﯘﻻﻟﯩﺴﯩﻨﯩﯔ ﺯﺍﯞﺍﻟﻠﯩﻘﻘﺎ ﻳﯜﺯ ﺗﯘﺗﻘﺎﻥ ﺩﻩﯞﺭﻯ ﺋﯩﺪﻯ. ﺋﻪﻛﺴﯩﭽﻪ ﺑﯘ ﺩﻩﯞﯨﺮ، ﺋﯘﻳﻐﯘﺭﻻﺭﻧﯩﯔ ﺋﻪﯓ ﻗﯘﺩﺭﻩﺕ ﺗﺎﭘﻘﺎﻥ، ﺑﯜﻳﯜﻙ ﺋﯩﻤﭙﯩﺮﯨﻴﻪﻟﻪﺭﻧﻰ ﻗﯘﺭﻏﺎﻥ ﭼﺎﻏﻠﯩﺮﻯ ﺋﯩﺪﻯ.

ﺧﯩﺘﺎﻳﻨﯩﯔ ﺗﺎﺭﯨﺨﯩﻲ ﭘﺎﻛﯩﺘﻼﺭﻧﻰ ﺋﻮﻳﺪﯗﺭﯗﭖ ﭼﯩﻘﯩﺮﯨﺶ ﺋﯜﭼﯜﻥ ﮪﻪﻣﻤﻪ ﺭﻩﺯﯨﻠﻠﯩﻜﻠﻪﺭﮔﻪ ﺑﺎﺵ ﺋﯘﺭﯨﺪﯨﻐﺎﻧﻠﯩﻘﻰ ﮪﻪﻣﻤﯩﮕﻪ ﻣﻪﻟﯘﻡ. ﺧﯩﺘﺎﻳﻼﺭ ﺋﯘﻳﻐﯘﺭﻻﺭﻧﯩﯔ ﺋﺎﻧﺎ ﯞﻩﺗﯩﻨﻰ ﺑﻮﻟﻐﺎﻥ ﻣﻮﯕﻐﯘﻟﯩﻴﻪ ﻳﺎﻳﻼﻗﻠﯩﺮﻯ ﯞﻩ ﺑﯜﮔﯜﻧﻜﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﻰ “2000 ﻳﯩﻠﺪﯨﻦ ﺑﯘﻳﺎﻥ ﺑﯩﺰ ﺋﯩﺪﺍﺭﻩ ﻗﯩﻠﯩﭗ ﻛﻪﻟﮕﻪﻥ” ﺩﯦﮕﻪﻥ ﻳﺎﻟﻐﺎﻧﻨﻰ ﺭﺍﺳﺘﻘﺎ ﺋﺎﻳﻼﻧﺪﯗﺭﯗﺵ ﺋﯜﭼﯜﻥ ﮪﻪﻗﯩﻘﻪﺗﻪﻧﻤﯘ ﻛﯚﭖ ﺋﻪﺟﯩﺮﻟﻪﺭ ﺳﻪﺭﭖ ﻗﯩﻠﺪﻯ ﮪﻪﻡ ﻗﯩﻠﻤﺎﻗﺘﺎ.

ﺗﺎﯓ ﺳﯘﻻﻟﯩﺴﻰ ﺩﻩﯞﺭﻯ ﺗﯩﻠﻐﺎ ﺋﯧﻠﯩﻨﻐﺎﻧﺪﺍ، ﺋﯘﻳﻐﯘﺭﻻﺭﻧﯩﯔ ﺋﯧﺴﯩﮕﻪ ﺋﯚﯕﻠﯜﻙ، ﺳﯚﻳﮕﯜﻥ (ﺧﯩﺘﺎﻳﭽﻪ ﺋﺎﺗﯩﻠﯩﺸﻰ: ﺋﻪﻧﻠﯘﺷﻪﻥ، ﺷﻰ ﺳﯩﻤﯩﯔ) ﻗﻮﺯﻏﯩﻠﯩﯖﻰ ﯞﻩ ﺋﻮﺭﺧﯘﻥ ﺋﯘﻳﻐﯘﺭ ﻗﺎﻏﺎﻧﻠﯩﻘﻰ ﻛﯧﻠﯩﺪﯗ.

ﺋﯚﯕﻠﯜﻙ-ﺳﯚﻳﮕﯜﻥ ﻗﻮﺯﻏﯩﻼﯕﭽﯩﻠﯩﺮﻯ 755-ﻳﯩﻠﻰ 160 ﻣﯩﯔ ﻟﻪﺷﻜﻪﺭ ﺑﯩﻠﻪﻥ ﺗﺎﯓ ﺳﯘﻻﻟﯩﺴﻰ ﭘﺎﻳﺘﻪﺧﺘﻰ ﻟﻮﻳﺎﯕﻨﻰ ﺋﯩﺸﻐﺎﻝ ﻗﯩﻠﻐﺎﻧﺪﺍ، ﺗﺎﯓ ﭘﺎﺩﯨﺸﺎﮪﻰ ﺳﯘﺯﻭﯓ ﺟﯧﻨﯩﻨﻰ ﺋﯧﻠﯩﭗ ﺳﯩﭽﯜﯞﻩﻥﮔﻪ ﻗﯧﭽﯩﭗ ﻛﯧﺘﯩﺪﯗ ﯞﻩ ﺋﯘﻳﻐﯘﺭ ﻗﺎﻏﺎﻧﻠﯩﻘﯩﺪﯨﻦ ﻳﺎﺭﺩﻩﻡ ﺗﻪﻟﻪﭖ ﻗﯩﻠﯩﺪﯗ.

ﺋﻮﺭﺧﯘﻥ ﺋﯘﻳﻐﯘﺭ ﻗﺎﻏﺎﻧﻠﯩﻘﯩﻨﯩﯔ ﻗﺎﻏﺎﻧﻰ ﺑﺎﻳﺎﻧﭽﯘﺭ 4000 ﻛﯩﺸﯩﻠﯩﻚ ﺋﺎﺗﻠﯩﻖ ﻗﻮﺷﯘﻥ ﺑﯩﻠﻪﻥ ﺧﯩﺘﺎﻳﻐﺎ ﺑﯧﺴﯩﭗ ﻛﯩﺮﯨﭗ، ﻗﻮﺯﻏﯩﻼﯕﻨﻰ ﺗﯩﻨﺠﯩﺘﯩﭗ، ﻟﻮﻳﺎﯓ ﯞﻩ ﭼﺎﯓﺋﻪﻧﻨﻰ ﺑﯧﺴﯩﯟﺍﻟﯩﺪﯗ. ﺗﺎﯓ ﺳﯘﻻﻟﯩﺴﻰ ﺋﯚﯕﻠﯜﻙ-ﺳﯚﻳﮕﯜﻥ ﻗﻮﺯﻏﯩﻼﯕﭽﯩﻠﯩﺮﯨﺪﯨﻦ ﻗﯘﺗﯘﻟﻐﺎﻥ ﺑﻮﻟﺴﯩﻤﯘ، ﺋﻪﻣﺪﻯ ﺋﻮﺭﺧﯘﻥ ﺋﯘﻳﻐﯘﺭ ﻗﺎﻏﺎﻧﻠﯩﻘﯩﻨﯩﯔ ﻟﻪﺷﻜﻪﺭﻟﯩﺮﯨﺪﯨﻦ ﺋﺎﺳﺎﻧﻠﯩﻘﭽﻪ ﻗﯘﺗﯘﻻﻟﻤﺎﻳﺪﯗ. ﺋﯘﻳﻐﯘﺭﻻﺭ ﺑﯘ ﺷﻪﮪﻪﺭﻟﻪﺭﺩﻩ ﺋﯚﺯﻯ ﺧﺎﻥ، ﺋﯚﺯﻯ ﺑﻪﮒ ﻳﺎﺷﺎﺷﻘﺎ ﺑﺎﺷﻼﻳﺪﯗ.

ﺋﯘﻳﻐﯘﺭﻻﺭﺩﯨﻦ ﻗﯘﺗﯘﻟﯘﺷﺘﺎ ﻗﯧﻴﯩﻨﭽﯩﻠﯩﻘﻘﺎ ﺩﯗﭺ ﻛﻪﻟﮕﻪﻥ ﺗﺎﯓ ﭘﺎﺩﯨﺸﺎﮪﻰ ﺑﻮﻟﺴﺎ، ﺋﺎﻗﯩﯟﻩﺗﺘﻪ ﺑﺎﻳﺎﻧﭽﯘﺭ ﻗﺎﻏﺎﻧﻐﺎ ﺋﯚﺯ ﺋﻮﺭﺩﯨﺴﯩﻨﯩﯔ ﻗﯩﺰﯨﻨﻰ ﺑﯧﺮﯨﭗ، ﻧﯘﺭﻏﯘﻥ ﺳﻮﯞﻏﺎ-ﺳﺎﻻﻣﻼﺭ ﮪﻪﺩﯨﻴﻪ ﻗﯩﻠﯩﭗ، ﻳﯩﻠﯩﻐﺎ 20 ﻣﯩﯔ ﺗﻮﭖ ﻳﯩﭙﻪﻙ ﺭﻩﺧﺖ ﺗﯚﻟﻪﺵ ﯞﻩﺩﯨﺴﻰ ﺑﯩﻠﻪﻥ ﺋﯘﻳﻐﯘﺭﻻﺭﺩﯨﻦ ﻣﯩﯔ ﺗﻪﺳﺘﻪ ﻗﯘﺗﯘﻟﯘﺷﻘﺎ ﻣﯘﻳﻪﺳﺴﻪﺭ ﺑﻮﻟﯩﺪﯗ. ﻣﺎﻧﺎ ﺑﯘ، ﺧﯩﺘﺎﻱ ﯞﻩ ﭼﻪﺕ ﺋﻪﻝ ﺗﺎﺭﯨﺨﭽﯩﻠﯩﺮﻯ ﻳﯧﺰﯨﭗ ﻗﺎﻟﺪﯗﺭﻏﺎﻥ ﮪﻪﻗﯩﻘﯩﻲ ﺗﺎﺭﯨﺦ.

https://finance.sina.com.cn/jjxw/2026-03-25/doc-inhscnuk1431788.shtml