ئۇيغۇر تەتقىقات مەركىزى ئامېرىكا پايتەختى ۋاشىنگتوندا قۇرۇلغان ئىلمىي تەتقىقات بىلەن پائالىيەتنى بىرلەشتۈرگەن بىر ئورگان بولۇپ، ئۇيغۇرلارغا ئائىت تەتقىقات ۋە پائالىيەتنى ئاساس قىلغان ھالدا مەشغۇلات قىلىدۇ. مەركىزىمىز ئۇيغۇرلارنىڭ تارىخى، مەدەنىيىتى ۋە سىياسىي ھاياتىغا ئائىت تۈرلۈك تەتقىقاتلارنى ئېلىپ بېرىش بىلەن بىرگە، تارىخىي مىراسلارنى قېزىپ چىقىپ، ئىلمىي ۋارىسلىق قىلغان ئاساستا راۋاجلاندۇرىدۇ. جۈملىدىن شەرقىي تۈركىستان دەۋاسى ۋە ئۇيغۇر ئىرقىي قىرغىنچىلىقىنى ئىلمىي پاكىتلار بىلەن دۇنياغا تۇنۇتۇش ۋە ئۇيغۇرلارنى يېڭى پىكىر-چۈشەنچىلەر بىلەن تەمىنلەش ئۈچۈن ھەر تۈرلۈك ئىلمىي پائالىيەتلەرنى ئېلىپ بارىدۇ.

ۋەزىپىمىز

(1) ئۇيغۇرلارنىڭ تارىخى، مەدەنىيىتى ۋە سىياسىي ھاياتىغا ئائىت تۈرلۈك تەتقىقاتلار بىلەن شۇغۇللىنىش، جۈملىدىن تارىخىي ئەسەرلەرنى قېزىپ چىقىپ، رەتلەپ  ھەر قايسى تىللاردا ئېلان قىلىش ۋە تارىخي شەخسلەرنى تۇنۇشتۇرۇش. (2) شەرقىي تۈركىستان دەۋاسى ۋە ئۇيغۇرلارنىڭ نۆۋەتتىكى ۋەزىيىتىنى چۆرىدىگەن ھالدا ھەر تۈرلۈك ئىلمىي پائالىيەتلەرنى ئېلىپ بېرىش، مۇناسىۋەتلىك جەمئىيەتلەر، خەلقئارا تەشكىلاتلار ۋە ھۆكۈمەتلەرنى ئالاقىدار دوكلات، تەتقىقات نەتىجىلىرى ۋە سىياسەت تەكلىپلىرى بىلەن تەمىنلەش. (3) ئۇيغۇرلارنىڭ ئىلمىي مەۋجۇتلۇقىنى كاپالەتكە ئىگە قىلىش ۋە شەرقىي تۈركىستان دەۋاسىنىڭ ساغلام تەرەققىي قىلىشى ئۈچۈن ھەر تۈرلۈك يېڭى چۈشەنچىلەرنى ئوتتۇرىغا قۇيۇش، يولۇققان مەسىلىلەرگە قارىتا تەكلىپ-پىكىر بېرىش ۋە ھەل قىلىش چارىلىرىنى سۇنۇش.

نىشانىمىز

مەركىزىمىز ھەر تۈرلۈك ئىلمىي تەتقىقات ۋە پائالىيەتلەر ئارقىلىق ئۇيغۇرلارنىڭ مىللىي مەۋجۇتلۇقىنى كۈچەيتىشنى؛ دۇنيا مىقياسىدا، خۇسۇسەن ئىسلام ئەللىرىدە شەرقىي تۈركىستان دەۋاسى ۋە ئۇيغۇر ئىرقىي قىرغىنچىلىقى، شۇنداقلا خىتاي ھۆكۈمىتىنىڭ شەرقىي تۈركىستاندا سادىر قىلىۋاتقان جىنايەتلىرىگە قارىتا توغرا تۇنۇش شەكىللەندۈرۈشنى؛ ئۇيغۇرلارنىڭ ئاڭ ساپاسىنى يۇقۇرى كۆتۈرۈش، ئۇمۇمىي بىرلىكىنى ئىلگىرى سۈرۈش ۋە شەرقىي تۈركىستان دەۋاسىنىڭ سۈپىتىنى ئۆستۈرۈشنى نىشان قىلىدۇ.

ئالاقىلىشىش:

contact@uyghurstudy.org