مۇھەممەد ئەمىن بۇغرا ئۆزىنىڭ «شەرقىي تۈركىستان تارىخى» ناملىق كىتابىدا ۋە «سىياسىي ھاياتىم» ناملىق خاتىراتىدا تەكىتلىگىنىدەك، ئۇ تەخمىنەن 13 ياش ۋاقىتلىرىدىن باشلاپلا قەلبىنى ۋەتەن قايغۇسى داغلاشقا باشلىغان بىر خىيالچان بالا ئىدى. 1923-يىلى ئەمدىلا 22 ياشقا كىرگەن مۇھەممەد ئەمىن بۇغرا خوتەن مەدرىسەلىرىدە مۇدەررىسلىك ھاياتىنى باشلىغىنىدا، ئۇنىڭ قەلبىنى يىللارچە داغلاپ كەلگەن ۋەتەن قايغۇسى لاۋۇلداپ يېنىشقا باشلايدۇ. شۇنىڭدىن كېيىنكى 10 يىللىق مۇدەررىسلىك ھاياتىدا ئۇ بىر تەرەپتىن تالىپلىرىنىڭ قەلبىگە ئىلىم-ھېكمەت نۇرىنى سىڭدۈرۈشكە تىرىشسا، يەنە بىر تەرەپتىن ۋەتەن-مىللەت تەقدىرىنىڭ باشقا بارلىق تەقەززالار ئىچىدىكى ئەڭ تەخىرسىز بۇرچ ئىكەنلىكىنى ھېس قىلدۇرۇىدۇ. شۇڭىمۇ پروفېسسور ئالىمجان ئىنايەت ئەپەندى تەكىتلىگەندەك، مۇھەممەد ئەمىن بۇغرا يېتىشتۈرگەن تالىپلارنىڭ خوتەن ئىنقىلابىدا ئاساسلىق ئەسكىرىي قوشۇننى ۋە ئەڭ مۇھىم قۇراللىق كۈچنى تەشكىل قىلىشى، تاسادىپىيلىق ئەمەس ئىدى.
نەشر ھوقۇقى ئۇيغۇر تەتقىقاتى مەركىزىگە تەۋە - بارلىق ھوقۇقلار قوغدىلىدۇ
Leave Your Comments